Ábyrg ferðaþjónusta

Tanni Travel skrifaði undir yfirlýsingu Festu og Íslenska ferðaklasans 10. janúar 2017, þar sem undirritaðir ætla að stuðla að ábyrgri ferðaþjónustu með því að:
 
– Ganga vel um og virða náttúruna.
– Tryggja öryggi gesta sinna og koma fram við þá af háttvísi.
– Virða réttindi starfsfólks.
– Hafa jákvæð áhrif á nærsamfélagið.
​
Í ferðaþjónustunni eru margar áskoranir sem snúa að samfélagsábyrgð fyrirtækja. Þar má telja aukinn ágang á náttúruna, að réttindi starfsfólks séu virt, að nærsamfélögin sem ferðamenn heimsækja fái sanngjarnan skerf af ávinningnum og ekki síst að öryggi ferðamanna sé tryggt og þeim veitt góð þjónusta.

Ferðaþjónustan á Íslandi er mikilvæg atvinnugrein sem getur stuðlað að langtíma velferð og góðum orðstír þjóðarinnar. Við munum setja okkur markmið um ofangreinda þætti, mæla og birta reglulega upplýsingar um árangur fyrirtækisins. 

---

---

Stefnur Tanna Travel

Persónuverndarstefna

Umhverfisstefna

Mannauðsstefna

Áfengis- og vímuefnastefna

Heilsustefna

Öryggisstefna

Jafnréttisstefna

Starfsmannastefna

Stefna gegn einelti, kynbundinni og kynferðislegri áreitni

​​

Umhverfisstefna

Meginmarkmið umhverfisstefnu Tanna Travel er að vera til fyrirmyndar í umhverfismálum og sinna eftirtöldum þáttum:

• Taka skal umhverfisáhrif með í reikninginn í öllum ákvörðunum fyrirtækisins: varðandi rekstur, kaup á nýjum bílum, rekstur verkstæðis, skipulagningu ferða og upplýsingum til gesta.
• Leggja áherslu á að efla umhverfisvitund starfsfólks og áhuga þeirra á mikilvægi umhverfismála með reglulegri þjálfun.
• Leggja skal áherslu á góða umgengni við umhverfið, endurnota og endurvinna það sem fellur til í rekstri eins og hægt er en farga öðru á viðeigandi hátt.
• Vinna skal með stofnunum, sveitarfélaginu og fyrirtækjum á svæðinu að umhverfismálum og hafa frumkvæði að því að taka upp umhverfisvæna starfshætti.
• Vinna að því að draga úr notkun efna sem skaða umhverfið.
• Hafa umhverfismál inni í starfs- og verklagslýsingum starfsmanna, þar sem tekið er fram að ganga skuli varlega um náttúruna og vernda söguleg- og menningarleg svæði fyrir raski. 
• Reyna er að koma í veg fyrir umhverfisspjöll og sýna gott fordæmi með því að fara í hvívetna að umhverfisverndarlögum.
• Birgðasalar eru hvattir til að bjóða umhverfisvæna vöru og þjónustu.
• Umgengni við náttúru, vernda söguleg og menningarlega mikilvæga staði fyrir raski.

Mannauðsstefna

Tanni Travel stefnir að því að hafa jafnan á að skipa hæfum og áhugasömum starfsmönnum svo tryggja megi nauðsynlegt frumkvæði í störfum og framúrskrarandi þjónustu.

• Fyrirtækið vill tryggja starfsmönnum bestu starfsskilyrði og möguleika til að vaxa og dafna í starfi jafnframt því að skapa þeim aðstæður til að samræma starf og fjölskyldulíf.
• Yfirmenn hafa þá skyldu að hafa í heiðri mannauðsstefnuna og sjá til þess að farið sé að reglum og fyrirmælum bæði með tilliti til hagsmuna fyirirtækisins og starfsmannsins.
• Löggjöf á hverjum tíma, reglur, fyrirmæli og kjarasamningar mynda ramma um ákvarðanir um starfsmannamál. Það er stefna fyrirtækisins að virða í hvívetna lagalegar og samningsbundnar skyldur sínar og fara eftir þeim reglum og kjarasamningum sem gilda hverju sinni. 

Áfengis- og vímuefnastefna

​Tanni Travel er leiðandi fyrirtæki í ferðaþjónustu á Austurlandi og lítur á það sem skyldu sína að haga vinnubrögðum sínum á þann hátt að fyllsta öryggis sé alltaf gætt.

• Starfsmönnum er með öllu óheimilt að neyta eða vera undir áhrifum áfengis eða vímuefna við störf sín. 
• Starfsmaður skal gera yfirmanni sínum viðvart ef hann er á lyfjum sem sljóvgað geta dómgreind hans og einbeitingu og skal yfirmaður þá velja honum verkefni í samræmi við það.
• Tanni Travel leggur sitt að mörkum til að starfsfólk sem á við áfengis- og/eða vímuefnavanda að etja, fái þá aðstoð sem möguleg er til að takast á við vanda sinn.
• Viðurlög við brotum á áfengis- og vímuefnastefnu fyrirtækisins er brottrekstur úr starfi.

Heilsustefna

Meginmarkmið heilsustefnu Tanna Travel er að stuðla að aukinni andlegri og líkamlegri
vellíðan starfsfólks og þannig auknum lífsgæðum.
 
Undirmarkmið heilsustefnu eru eftirfarandi:

• Að bæta vinnuumhverfi, auka upplýsingastreymi og efla lífsgæði starfsmanna.
• Að mæta sálrænum, félagslegum og líkamlegum þörfum starfsmanna á vinnustað á sem árangusríkastan hátt.
• Að leitast við að auka heilbrigði starfsmanna og þar með draga úr veikindum þeirra og fjarvistum sem orsakast af vinnutengdu álagi.
• Að hvetja til alhliða heilsueflingar meðal starfsmanna.
• Að gera starfsfólk meðvitaðra um réttindi sín og möguleika á styrkjum stéttarfélaga til heilsubótar.
• Að stuðla að því að aðbúnaður og hollustuhættir á vinnustað séu eins og best verður á kosið.

Öryggisstefna

Stefna Tanna Travel er að tryggja öllum viðskiptavinum og starfsmönnum öruggt og heilsusamlegt umhverfi eins og frekast er unnt.

• Í starfsemi fyrirtækisins er gert ráð fyrir að fylgt sé öllum kröfum samkvæmt lögum og reglum og að sífellt sé unnið að endurbótum sem stuðla að auknu öryggi viðskiptavina, starfsmanna og samstarfsaðila.

• Fyrirtækið heldur námskeið í skyndihjálp til að vera betur í stakk búin að taka á vandamálum eða slysum sem orðið geta, ekki sjaldnar en á tveggja ára fresti.
• Við leggjum metnað okkar í að búnaður sem notaður er í starfi fyrirtækisins sé skoðaður og prófaður reglulega og standist þær öryggiskröfur sem til hans eru gerðar.
• Við gerum áhættugreiningar fyrir svæði sem fyrirtækið starfar á.  Sérstaklega er hugað að veðri að haust- og vetrarlagi þegar veður eru vályndari.
• Við hvetjum til virkrar þátttöku allra starfsmanna í þjálfunar- og öryggismálum.
• Við notum undir öllum kringumstæðum viðeigandi öryggisbúnað, hlífðarfatnað og persónuhlífar.
• Stefnu þessa skal endurskoða svo oft sem nauðsyn krefur þó aldrei sjaldnar en á tveggja ára fresti. 

Jafnréttisstefna

• Starfsmönnum og viðskiptavinum er ekki mismunað t.d. eftir kynferði, hjónabandsstöðu, trúar- eða siðferðisskoðunum, hörundslit, kynþætti, þjóðerni, fötlun, aldri, stjórnmálaskoðunum, atvinnu- og fjölskyldustöðu eða kynhneigð.
• Tanni Travel er vinnustaður þar sem allir eiga jafna möguleika til starfa og ákveðin störf flokkast ekki sem sérstök kynjastörf.
• Tryggja skal öllum kynjum jafna möguleika til starfa, ábyrgðar, launa, stöðuhækkana og þjálfunar, þar sem öll fá greidd jöfn laun fyrir jafn verðmæt störf.
• Hjá Tanna Travel á að ríkja jafnvægi milli vinnu og einkalífs.
• Tanni Travel líður ekki einelti, fordóma, kynbundna eða kynferðislega áreitni. 

Starfsmannastefna

• Fyrirtækið hefur yfir að ráða hæfu, vel menntuðu og áhugasömu starfsfólki sem sameiginlega skapar metnaðarfullt og jákvætt vinnuumhverfi. 
• Stuðla skal að góðum samskiptum meðal starfsfólks, jákvæðni, virðingu og hrósi.
• Hvatning til að verða sér úti um viðurkennd starfsréttindi.
• Stuðla skal að frumkvæði og ábyrgð starfsfólks.
• Stuðla skal að góðum starfsanda.
• Jafnréttis skal gætt í hvívetna.
• Starfsfólki skal tryggja gott starfsumhverfi.
• Tryggja skal öflugt upplýsingastreymi milli stjórnenda og starfsfólks um málefni og störf fyrirtækisins.
• Lögð er áhersla á að starfsfólk sýni hvert öðru og fyrirtækni trúnað.
• Starfsfólk skal eiga möguleika á að vaxa og dafna í starfi. 

Stefna gegn einelti, kynbundinni og kynferðislegri áreitni

• Það er stefna Tanna Travel að starfsfólk sýni samstarfsfólki sínu alltaf kurteisi og virðingu í samskiptum. Einelti, kynbundin og kynferðisleg áreitni verður undir engum kringumstæðum umborin hjá Tanna Travel, hvorki í starfi né leik. Meðvirkni starfsmanna í einelti og áreitni er fordæmd. 
• Á vinnustöðum getur komið upp ágreiningsmál og hagsmunaárekstrar sem valdið geta óþægindum. Mikilvægt er að leita til næsta yfirmanns eða trúnaðarmanns og leitast við að leysa slík mál án tafar áður en þau þróast til verri vegar. Ef yfirmaður er gerandinn eða hundsar vandamálið skal leita til trúnaðarmanns eða stéttarfélags viðkomandi. 
• Tekið verður á fölskum ásökunum um einelti af sömu festu og einelti almennt. Tanni Travel mun grípa til aðgerða gagnvart starfsmönnum sem leggja aðra í einelti með fræðslu og t.d. með áminningu, tilflutningi í starfi eða uppsögn. Alvarleg atvik verða hugsanlega kærð að höfðu samráði við þolanda. Gerandi eineltis verður látinn axla ábyrgð. 

Skilgreiningar

• Einelti: Síendurtekin hegðun, sem almennt er til þess fallinn að valda vanlíðan hjá þeim sem fyrir henni verður, svo sem að gera lítið úr, móðga, særa eða ógna viðkomandi.
  
• Kynbundin áreitni: Hegðun sem tengist kyni þess sem fyrir henni verður, er í óþökk viðkomandi og hefur þann tilgang eða þau áhrif að misbjóða virðingu viðkomandi og skapa aðstæður sem eru ógnandi, fjandsamlegar, niðurlægjandi, auðmýkjandi eða móðgandi.
  
• Kynferðisleg áreitni: Hvers kyns kynferðisleg hegðun sem er í óþökk þess sem fyrir henni verður og hefur þann tilgang eða þau áhrif að misbjóða virðingu viðkomandi, einkum þegar hegðunin leiðir til ógnandi, fjandsamlegra, niðurlægjandi, auðmýkjandi eða móðgandi aðstæðna. Hegðunin getur verið orðbundin, tákræn og/eða líkamleg.
  
• Ofbeldi: Hvers kyns hegðun sem leiðir til, eða gæti leitt til, líkamlegs eða sálræns skaða eða þjáningar þess sem fyrir henni verður. Einnig hótun um slíkt, þvingun eða handahófskennd svipting frelsis. 
  
• Önnur ótilhlýðileg háttsemi: Getur meðal annars falist í lítilsvirðandi framkomu, klámfenginni háttsemi eða snertingu sem þykir nærgöngul eða óviðeigandi. 
  
• Meintur þolandi: Sá sem telur sig verða fyrir einelti, kynferðislegri áreitni, kynbundinni áreitni, ofbeldi eða ótilhlýðilegri háttsemi.
  
• Meintur gerandi: Sá sem kvörtun um einelti, kynferðislega áreitni, kynbundna áreitni, ofbeldi eða ótilhlýðilega háttsemi beinist að. 
  

Skoðanaágreiningur milli starfsmanna eða ágreiningur vegna ólíkra hagsmuna fellur ekki undir neitt af ofangreindu.