Ferðin
|
Að hverfa frá amstri hversdagsins, stinga sér út í dásamlega náttúruna, gleyma stund og stað, finna lyktina af mosanum og næra sína innri villikonu er það sem við viljum upplifa í þessari ferð.
Barðsnes er eitt elsta svæði Íslands og það engu líkt að finna orkuna sem svæðið gefur. Í ferðinni leggjum við áherslu á að njóta fremur en að þjóta enda náttúrufegurð svæðisins engu lík, áherslan á nærandi útivist, lífsgleði og samveru. Dagur 1 - sunnudagurinn 25. júní 2023 Mæting við Hótel Eskifjörð kl.10:00, farið með rútu til Viðfjarðar. Gengið út að Barðsnesbænum þar sem við gistum í tvær nætur. Þegar konur hafa komið sér fyrir, er það sem eftir er dags nýtt í að njóta nærsvæðisins. Hægt að skella sér í sjóinn er veður leyfir, náttúrustund, villikonunni hleypt út. Slökun í fjörunni. Hér sér hver kona um sinn kvöldverð. Þægilegur dagur með mikilli náttúruupplifun en gengið með allt á bakinu nema tjald. Fyrir ferðina verður boðið upp á hitting á netinu þar sem farið verður yfir hvernig best er að pakka í bakpokann, hvað verður hægt að skilja eftir í Viðfirði, sem ekki þarf að ganga með út á Barðsnes, hvað er mikilvægt að hafa með og hvað má kannski bara skilja eftir heima. Hækkun: Óveruleg Fjöldi km: 8 Erfiðleikastig ferðar: 2/5 Dagur 2 - mánudagurinn 26. júní 2023 Við byrjum daginn á góðum yoga teygjum og setjum okkur í réttan gang fyrir daginn. Gengið út að Rauðubjörgum og alla leið út að Gullþúfu á Barðsneshorni. Þetta er eitt dásamlegasta svæði á landinu og ólýsanlegt að sitja og horfa yfir hafið af Gullþúfu. Í dag er nóg að ganga bara með það á bakinu sem þarf til dagsins. Þegar komið er til baka, fyrir kvöldverð, þá endum við á góðum yoga teygjum. Í kvöld sér hver kona um sinn kvöldverð. Gist í Barðsnesbænum. Hækkun: Óveruleg Fjöldi km: 12 Erfiðleikastig ferðar: 2/5 Dagur 3 - þriðjudagurinn 27. júní 2023 Í dag byrjum við aftur á góðum yoga teygjum og dásemdar kakó athöfn. Við göngum svo frá Barðsnesbænum, til baka inn Viðfjörðinn. Áhersla lögð á nærandi útivist og samveru, að fagna lífinu og vera til. Við finnum okkur góðan stað þar sem við tökum góða og endurnærandi yoga stund. Leggjum áherslu á núvitund, þakklæti og notalegheit. Í dag göngum við aftur með allt á bakinu. Í kvöld verðum við með sameiginlega máltíð í Viðfjarðarbænum, þar sem við gistum, með aðgangi að dásamlegum svörtum sandi, hægt að skella sér í sjósund og gufubað á eftir. Hækkun: Óveruleg Fjöldi km: 8 Erfiðleikastig ferðar: 2/5 Dagur 4 - miðvikudagurinn 28. júní 2023 Gengið frá Viðfjarðarbænum, yfir til Vöðlavíkur. Göngum eftir veginum um Trollabotna og niður Dysjardal meðfram Dysjardalsá og hennar frábæru fossaröð. Á göngunni blöndum við inn því sem við höfum kynnst síðustu daga, að njóta og vera og sameinast náttúrunni. Við endum við skála Ferðafélags Fjarðamanna við Karlsstaði í Vöðlavík, teygjum okkur og togum eftir dásemdardaga á einu af fallegasta útivistarsvæði á Íslandi. Rúta sækir hópinn í Vöðlavík og flytur aftur til Eskifjarðar. Í dag er nóg að ganga bara með það sem þarf til dagsins, rútan sækir annað dót í Viðfjörð áður en hópurinn er sóttur til Vöðlavíkur. Hækkun: 400 m. Fjöldi km: 10 Erfiðleikastig ferðar: 3/5 |
Hvað þarf að hafa með
Innifalið
Fararstjórar
Hildur Bergsdóttir, fjallaleiðsögumaður, náttúruþerapisti og yogakennari. Linda E. Pehrsson, fjallaleiðsögumaður, náttúrumarkþjálfi og yogakennari. Þær hafa frá blautu barnsbeini unað sér best úti í náttúrunni og segja má að sameiginleg ástríða þeirra fyrir útiveru, mannrækt og lífsgleði sé grunnurinn að þessari ferð. |
