Í þessari hjólaferð er farið um svæði sem fáir Íslendingar bera nokkurn tíma augum. Alls er ferðin þrír dagar og tvær nætur og hefst för á Eskifirði. Farið verður um Vöðlavík og Viðfjörð sem hafa verið í eyði í áratugi. Á síðasta degi er svo hjólað upp og yfir Oddskarð sem er á milli Norðfjarðar og Eskifjarðar. 

Dagur 1
Ferðin hefst á Eskifirði og er hjólað þaðan út hinn fornfræga Helgustaðahrepp. Þaðan liggur leið okkar upp og yfir Víkurheiði og yfir í Vöðlavík. Vöðlavík hefur verið í eyði síðan 1968. Hún er rómuð fyrir náttúrufegurð og stendur heimamönnun nær hjarta. Þar er snæddur kvöldverður og gist í skála Ferðafélags Fjarðamanna á Karlsstöðum.

Dagur 2
Á degi tvö er hjólað sem leið liggur upp úr Vöðlavík og yfir í Viðfjörð. Þó Viðfjörður hafi fyrir löngu farið í eyði að þá var sú tíð að hann var miðstöð samgagna á svæðinu. Frá Viðfirði liggur leiðin yfir í Norðfjörð með bát (ef veður leyfir, annars sækir bíll fólkið). Eftir kvöldverð í Beituskúrnum taka bændur á Skorrastað á móti okkur og verður höfð þar næturseta.

Dagur 3
Á síðasta degi er hjólað um gamla fjallveginn yfir Oddskarð, þar sem útsýnið er frábært yfir Hólmatind við Eskifjörð og út Reyðarfjörðinn.  Hjólað er niður á Eskifjörð, þar sem ferðin endar.

Erfileikastig ferðar
4/5

Verð:
89.000,- á manninn
Aukagjald fyrir eins manns herbergi 5.500 kr.

Skráning í tölvupósti eða í síma 476-1399, milli 10:00 og 12:00, alla virka daga.

Innifalið
Fararstjórn, svefnpokapláss í skálanum í Vöðlavík, uppbúið rúm í tveggja manna herbergi á Skorrastað, morgunverður og nesti til dagsins sem þátttakendur útbúa sjálfir við morgunverðinn. Kvöldverður í Vöðlavík og á Beituskúrnum í Neskaupstað. Trússbíll með farangur.

Ekki innifalið
Fjallahjól og annað útbúnaður fyrir hjólaferð, svefnpoki, búnaður sem þarf til göngu og hjólreiða, drykkir, snarl, fæðubótarefni og ferðatryggingar.
​
Með í för
Gestir þurfa að hafa með hlýjan, vind- og vatnsþéttan fatnað, skó til göngu og hjólreiða, svefnpoka, vatnsbrúsa, lítinn bakpoka, nestissnarl og hjólið sitt.

Innanbúðar upplýsingar:
Fyrir þá sem vilja bæta við nótt, fyrir eða eftir ferð, er frábært að gista á Mjóeyri við Eskifjörð, fá sér kvöldverð á Randulffssjóhúsi og léttan göngutúr í Hólmanesi eða að ganga á bæjarfjallið Hólmatind sem gnæfir yfir, við fjörðinn.

Fararstjóri og leiðsögumaður er Þórdís Kristvinsdóttir.  Þórdís hefur um árabil stýrt ungliðastarfi í hjólreiðum hjá ungmennafélaginu Þristi á Héraði. Hún er úti allt sumarið og leiðir fólk um fjöll og firnindi Austurlands.

​Hún er menntuð í leiðsögn og hefur reynslu af fjallaferðum, hjólaferðum, gönguferðum, hvataferðum og jeppaferðum.

Myndir úr ferðinni: